Kaisi Bakhshish Ka Yeh Saaman Hua Phirta Hai
Shehar Sara Hi Pareshan Hua Phirta Hai
Aik Barood Ki Jacket Aur Nara-E-Takbeer,
Rasta Khuld Ka Aasan Hua Phirta Hai
Kaisa Aashiq Hai Tere Naam Pe Qurban Hai Magar
Teri Har Baat Se Anjaan Hua Phirta Hai
Shab Ko Shaitaan Bhi Mange Panahain Jis Se
Subh Woh Sahib-E-Emaan Hua Phirta Hai
Hum Ko Jakra Hai Yahan Jabar Ki Zanjeeron Ne
Ab To Yeh Shehar Hi Zindaan Hua Phirta Hai
Janay Kab Koun Kise Maar Day Kafir Keh Kar
Shehar Ka Shehar Musalman Hua Phirta Hai
- Naa-Maloom Shayar
